مامۆستایانی میلاک و وانەبێژی پەروەردەی پێنجوێن بڕیاریاندا لە سبەینێوە بگەڕێنەوە هۆڵەکانی خوێندن.
دەستەی نوێنەرانی مامۆستایانی میلاک و وانەبێژی پەروەردەی پێنجوێن لە راگەیەندراوێکدا بڵاویکردەوە، دوای زیاتر لە پێنج مانگ بایکۆت و خۆپیشاندان بەشێوەیەکی مەدەنی و دوور لە توندوتیژی، وەک مامۆستایانی وانەبێژ و دامەزراوی پەروەردەی پێنجوێن، دوای بڕیارەکەی دادگای فیدراڵی کە بەتەواوی لەبەرژەوەندی مامۆستایان و فەرمانبەرانی هەرێمە، بایکۆت دەشکێنین.
ئاماژە بەوەش دەکات، وەک مامۆستایانی وانەبێژ و دامەزراوی پەروەردەی پێنجوێن پێمان وایە ئەمە دەستکەوتی خۆپیشاندان و بایکۆت بووە و سەرەتایەکە بۆ کۆتایهاتنی ئەو زوڵمو ستەمەی لە رابردوودا بەرامبەر مامۆستایان کراوە.
لە راگەیەندراوەکەدا هاتووە، رۆژی یەک شەممە 25ی شوباتی 2024 لە پەروەردەی پێنجوێن بایکۆت دەوەستێنین و دەوامی فەرمی دەسپێدەکاتەوە.
