سەرۆکی هەرێمی کوردستان رایگەیاند، هەرێمی کوردستان بەتەنها بڕیار لەبارەی مانەوەی هێزەکانی هاوپەیمانان نادات و لەچوارچێوەی عێراقدا بابەتەکە یەکلادەکاتەوە و داواشی لە عێراق کرد، رۆڵی بنچینەیی هەبێت لە پاراستنی هەرێم.
نێچیرڤان بارزانی سەرۆکی هەرێمی کوردستان لە لێدوانێکدا رایگەیاند، پێویستە کۆتایی بە کردەوەکانی گروپە چەکدارەکان بهێنرێت.
ئاماژەی بەوەشکرد، هەرێم ترسی ئەوەی هەیە کە بەغدا نەتوانێت بیپارێزێت لە کاتێکدا ئالنگارییەکانی ئێستا لە قۆناغی رابردوو سەختترن و کۆتایی هێڵەکە دیارنییە.
نێچیرڤانی بارزانی هەر جۆرە پەیوەندییەکی هەرێمی کوردستانی لەگەڵ وڵاتی ئیسرائیل رەتکردەوەو دەڵێت، “هیچ جۆرە پەیوەندییەکمان لەگەڵ ئەو وڵاتە نییە و هیچ بنکەیەکیان لەناو خاکی هەرێمدا نییە و هەرێم هەرەشە نییە بۆ سەر ئێران.
ئاماژەی بەوەشکرد، حکومەتی هەرێم بە روونییەکی تەواو مامەڵەی لەگەڵ بەغداد کردووە سەبارەت بە مەلەفی داهاتەکان، بە لەبەرچاوگرتنی ئەوەی کە دۆخی ئابوریی هەرێم “سەخت و ئاڵۆزە”.
