وەزیری کار و کاروباری کۆمەڵایەتیی هەرێمی کوردستان رایدەگەیەنێت، لە کۆی 13 هەزار و 252 خاوەن پێداویستیی تایبەت کە تۆمارمانکردووە، سێ هەزار کەسیان توشبووی ئۆتیزمن و کارمان کردووە کە مووچەیان بۆ دابینبکرێت.
کوێستان محەمەد، وەزیری کار و کاروباری کۆمەڵایەتیی هەرێمی کوردستان لە کۆنگرەیەکی رۆژنامەوانی لە میانەی دەستپێکردنی وۆرکشۆپێکی دوو رۆژی تایبەت بە توشبووانی ئۆتیزم ئاماژەی بەوە کرد، “زیاتر لە سێ هەزار منداڵی توشبووی ئۆتیزم تۆمارکراوە کە رێژەیەکی زۆرە و ئەرکێکی گەورەیە لەسەر خێزانەکانیان”.
ئەوەشی خستەڕوو، “لە ساڵانی رابردوو بە چەند شێوەیەک هاوکاری منداڵانی توشبووی ئۆتیزممان کردووە و توانیومانە چەندین سەنتەری حکومییان بۆ بکەینەوە و لە کەرتی تەندروستی خزمەتگوزاریی بێبەرامبەریان بۆ دابینبکەین”.
ئەو وەزیرەی حکومەتی هەرێم دەڵێت، “تا ئێستا 13 هەزار و 252 خاوەن پێداویستیی تایبەت و کەمئەنداممان تۆمارکردووە و ئەو تۆمارەمان ئاڕاستەی ئەنجومەنی وەزیران کردووە بۆئەوەی کە بتواندرێت مووچەیان بۆ دابینبکرێت”.
