سەرۆكی یەكێتی رایدەگەیەنێت، جەخت لە سەروەریی یاسا دەکەینەوە و رێگەنادەین تاوانکاران مەترسی بۆ ژیانی خەڵک دروستبکەن.
بافڵ جەلال تاڵەبانی، سەرۆکی یەکێتیی نیشتمانیی کوردستان لە پەیامێكدا رایگەیاند، مفەوەز رزگار ئەحمەد، شەهیدی چەسپاندنی یاسا و دادپەروەرییە و نموونەی باڵای دڵسۆزیی و خۆنەویستییە لەپێناو رووبەڕووبوونەوەی تاوانکاریدا.
بافڵ جەلال تاڵەبانی وێرای دەربڕینی پرسە و هاوخەمیی قووڵ بۆ کەسوکارەكەی و هیوای چاكبوونەوە بۆ هاوڕێ بریندارەكانی دەشڵێت، “رزگار شەهید ئەحمەد خەلیفە حەسەن زەنگەنە، کارمەندێکی دڵسۆز و سەرڕاست بوو، بنەماڵەکەشی نموونەی باڵای قوربانیدان و تێکۆشانن لەپێناو کوردستان”.
سەرۆكی یەكێتی سوپاس و دەستخۆشی ئاراستەی هێزە ئەمنییەکانی سلێمانی دەكات کە لە ماوەیەکی کەمدا تۆمەتبارانیان دەستگیرکرد و دەشڵێت، “جەخت لە سەروەریی یاسا دەکەینەوە و رێگەنادەین تاوانکاران مەترسی بۆ ژیانی خەڵک دروستبکەن و ئارامیی شارە خۆشەویستەکەمان بشێوێنن”.
شەوی رابردوو بە فەرمانی دادوەری لێکۆڵینەوە، هێزەکانی پۆلیسی نەهێشتنی تاوانی سلێمانی لە شەقامی پیرەمێرد هەوڵی دەستگیرکردنی چەند داواکراوێکیاندا، بەڵام داواكراوەكان رووبەڕووی هێزەكەی پۆلیس بوونەوە و بەهۆی تەقەكردنیانەوە مفەوەز رزگار ئەحمەد گیانیلەدەستدا و دوو پۆلیسی دیكەش برینداربوون.
