وەزیری دادی عێراق رایدەگەیەنێت، كێشەی گەڕەكی نەورۆز لە كەركوك لە رووی یاسایی و كارگێڕییەوە كۆتاییهات و سبەی نوێنەرانی ئەو گەڕەكە لە بەغداد لەگەڵ لایەنی پەیوەندیدار چەند كۆبوونەوەیەك ئەنجامدەدەن.
خالید شوانی وەزیری دادی عێراق لە لێدوانێكی رۆژنامەوانیدا رایگەیاند، لەلایەن وەزارەتی بەرگریی عێراقەوە كێشەی گەڕەكی نەورۆز لە كەركوك لە رووی یاسایی و كارگێڕییەوە كۆتاییهات و بڕیارە نوێنەری ئەو گەڕەكە سبەی لەگەڵ ئەمیندارێتیی گشتیی ئەنجومەنی وەزیرانی عێراق و ئەو لیژنەیەی بۆ چارەسەركردنی ئەو كێشەیە پێكهێندراوە كۆبوونەوە ئەنجامبدەن.
راشیگەیاند، لە ئێستادا لەگەڵ لایەنی پەیوەندیدار لەسەر هێڵین بەمەبەستی تەمیلكردنی خانووەكانی گەڕەكی نەورۆز لە كەركوك بەپێی یاسا و جێبەجێكردنی داواكاریی دانیشتووانی ئەو گەڕەكە.
