مامۆستایان و فەرمانبەرانی ناڕازی هەڵوێستی نوێ رادەگەیەنن

دوای نووسراوەكەی وەزارەتی پەروەردە مامۆستایان و فەرمانبەرانی ناڕازی وەڵام دەدەنەوە و هەڵوێستی نوێ رادەگەیەنن.

لە كۆنگرەیەكی رۆژنامەنووسیدا لە سلێمانی ئەنجومەنی سەرتاسەریی مامۆستایان و فەرمانبەرانی ناڕازی راگەیەندراوێكی وەك وەڵامی نووسراوەكەی وەزارەتی پەروەردە بڵاوكردەوە و تیایدا هاتووە، خەباتی مەدەنیی مامۆستایان و فەرمانبەران هەنگاوی گرنگی بڕیوە، ئەوەش لەڕێی هەوڵ و هاوهەڵوێستی هەمووانەوە هەبووە لە بەردەوامی خۆپیشاندان و ناڕەزایەتیی مەدەنی.

دەشڵێت، لە دوای كۆتایی هاتنی وەرزی یەكەم و مانەوەی دەرگای خوێندنگاكان بە داخراوی، لە 22ی 12ی 2023، لە رێی نوێنەرەكانیانەوە یاداشتیان پێشكەشی لایەنە پەیوەندیدارەكان كرد و جەختیان لە داخوازییەكان كردەوە.

“خوازیاربووین حكومەتی هەرێم بە ئەركی خۆی هەڵبستایە و بە دەم داخوازییەكانمان بهاتایە وەك ئەوەی لە هەستكردن بە بەرپرسیارێتی پێمان راگەیاندبوو” وەك ئەوەی لە بەشێكی دیكەی راگەیەندراوەكەدا هاتووە.

دووپاتیشیدەكاتەوە، ئەوەی ئەم دۆخە خراپەی دروستكردووە و ئەم قەیرانانە رۆژ بە رۆژ قوڵتر دەكاتەوە حكومەتی هەرێمی كوردستانە كە كەمتەرخەم بووە، وەك خۆلادانیش لە بەرپرسیارێتی، هۆكارەكانی ئەم كەمتەرخەمیە و قەیرانانەی بۆ حكومەتی عێراق گەڕاندووەتەوە، لەكاتێكدا ئێمە شاهێدی شكستی ئەم كابینەیە و كابینەكانی دیكەی حكومەتی هەرێمی كوردستانین، پێشمانوایە خۆلادان لە بەرپرسیارێتی قەیرانەكان قوڵتر دەكاتەوە.

هەروەك هەڵوێست و بڕیاری نوێیان لە چەند خاڵێكدا خستەڕوو:

1- مەرجداركردن خۆدزینەوەیە لە جێبەجێكردنی داخوازییەكان، چونكە داهاتی ناوخۆی هەرێم زۆر زیاترە لەو بڕەی بۆ داخوازییەكان پێویستە.

2- لە ساڵانی رابردووشدا بەڵێن و بڕیار دراوە بۆ جێبەجێكردنی داواكارییەكان، بەڵام بەداخەوە تەنها مەبەست لەو بەڵێن و بڕیارانە بۆ شكاندنی بایكۆت بووە، دوای دەستپێكردنەوەی خوێندن هەموو بەڵێن و بڕیارەكان وەك داخوازییەكانیان پشتگوێخراون.

3- حكومەت بەرپرسیارانە مامەڵەی نەكردووە بۆیە ناچاربوون بایكۆت و خۆپیشاندان بكەن. دەیانەوێت قەیرانەكان لێرەدا كۆتایی پێبێت و چارەسەری ریشەییان بۆ بكرێت، تا ناچارنەبن خۆپیشاندان ئەنجام بدەنەوە.

4- سبەی دووشەممە خۆپیشاندانی بەرفراوان لە سەرجەم شار و شارۆچكەكان درێژە بە بایكۆت و خەباتی مەدەنی دەدەن، تا ئەوكاتەی حكومەت بە خۆیدا دەچێتەوە و بەرپرسیارانە مامەڵە دەكات، بۆ ئەم مەبەستەش رووبەڕووی هەموو فشارەكان دەبنەوە.