رۆژی چوارشەممەی ئەم هەفتەیە شەپۆلێکی سەرما و بەفر و باران روو لە ناوچەکانی هەرێمی کوردستان و ناوەڕاست و باشووری عێراق دەکات.
دەستەی کەشناسیی عێراق بڵاویکردەوە، رۆژی چوارشەممە شەپۆلێکی بەفر و باران روو لە ناوچەکانی هەرێمی کوردستان و عێراق دەکات و پلەکانی گەرما تا شەش پلە دابەزین بەخۆیانەوە دەبینن.
بە گوێرەی ئەو پێشبینییانەی دەستەی کەشناسیی عێراق ئاشکرایکردووە، شەپۆلەکە لە رۆژی سێشەممە کاریگەرییەکەی دەستپێدەکات، دواتر لە رۆژی چوارشەممە بەهێزدەبێت و باران بارین زیاددەکات و رۆژی پێنجشەممە، باران بارین زیادتر دەبێت و ئەگەری بارینی بەفریش دەبێت لە ناوچەکانی هەرێمی کوردستان، دەکرێت لەناو سەنتەری شارەکانیش ببارێت.
لە شارەکانی ناوەڕاست و باشووری عێراقیش کاریگەریی شەپۆلەکە بە دابەزینی پلەکانی گەرما و باران بارین دەبێت.
بە گوێرەی ئەو زانیاریانەی پێگە جیهانییەکانی کەشوهەواش بڵاویانکردووەتەوە، ئەو شەپۆلەی ناوچەکانی هەرێمی کوردستان دەگرێتەوە ماوەی شەش رۆژ بەردەوام دەبێت و لە رۆژانی شەممە و یەکشەممەدا لە ناوەندی شارەکان بەفر و باران بەیەکەوە دەبارێت و دووشەمەی داهاتوو کۆتایی پێدێت.
