شەوی رابردوو، یانەی نەسڕ بە ئەنجامێکی گەورە لە یانەی ئیتیحادی بردەوە و سێ خاڵی گرنگی بەدەستهێنا و هەنگاوێک لە پێشەنگی خولی سعودی نزیک بووەوە، كریستیانۆ رۆناڵدۆی هێرشبەری یانەكەش مێژوویەكی بۆ خۆی تۆماركرد.
یارییەکە بە ئەنجامی 5 بە 2 لە بەرژەوەندیی نەسڕ کۆتایی هات، گۆڵەکان لەلایەن (کریستیانۆ رۆناڵدۆ 2 گۆڵ، سادیۆ مانێ 2 گۆڵ و تالێسکاش گۆڵێک) تۆماركران، عەبدولڕەزاق حەمدەڵڵا-ش 2 گۆڵەکەی ئیتیحادی تۆمارکرد.
ئەم سەرکەوتنە گەورەیەی نەسڕ بۆ دۆن جیاواز بوو، بەهۆی ئەوەی 2 گۆڵی تۆمارکرد و بەمەش لەمساڵدا بووە خاوەن بە 53 گۆڵ و لە ئاكامیدا بوو بە گۆڵکاری ساڵی 2023، دوای ئەوەی بە جیاوازیی گۆڵێک پێش هەریەک لە هاری کەین و مباپێ کەوت.
یاریزانەكە هێشتا یارییەکی دیکەشی ماوە ئەنجامیبدات، لە کاتێکدا ئەو دوو یاریزانەی دیکە لەمساڵدا هیچ یارییەکیان نەماوە.
رۆناڵدۆ تەمەنی 38 ساڵە، بەڵام هاوشێوەی یاریزانە لاوەکان بەردەوامە لە تۆمارکردنی گۆڵ و پێشکەشکردنی ئاستی بەرز لە یارییەکانی یانەکەیدا.
