وتەبێژی بازاری دراوی شاری سلێمانی رایدەگەیەنێت، دابەزینی بەهای دۆلار بەرامبەر بە دینار پەیوەندی بەو رێوشوێنانەوە هەیە كە لەلایەن حكومەت و بانكی ناوەندیی عێراقەوە گیراونەتەبەر و دەشڵێت، “عێراق رێككەوتنەكەی لەگەڵ چین جێبەجێبكات كاریگەری زیاتری لەسەر دابەزینی بەهای دۆلار بەرامبەر بە دینار دەبێت”.
جەبار گۆران وتەبێژی بازاری دراوی شاری سلێمانی لە لێدوانێكدا بە تۆڕی میدیایی ئێستای راگەیاند، حكومەت و بانكی ناوەندیی عێراق چەند رێوشوێنێكیان بۆ دابەزینی بەهای دۆلار گرتووەتەبەر بە تایبەت دوای رەزامەندیی بانكی فیدراڵیی ئەمریكا كە مامەڵەكردن لەگەڵ بەشێك لە وڵاتان لە بری دۆلار بە دینار و دراوی دیكە بێت و جگەلەوەش لە دوای سەری ساڵی نوێوە بەشێكی مامەڵە بازرگانییە ناوخۆییەكان لە بری دۆلار بە دینار دەبێت و هەموو ئەو هەنگاوانەش وایكردووە دۆلار دابەزین بەخۆوە ببینێت.
بە بڕوای جەبار گۆران ئەگەر عێراق رێككەوتنەكەی لەگەڵ چین جێبەجێبكات مامەڵە بە دۆلار نەكەن ئەوا كاریگەری زیاتری لەسەر دابەزینی بەهای دۆلار دەبێت و ئەوەش هەنگاو بە هەنگاو كاریگەری لەسەر بەهێزبوونی بەهای دینار دەبێت و بەهای دۆلار دادەبەزێت.
