وەزارەتی گواستنەوەی عێراق رایدەگەیەنێت، بلیتی فڕۆكەی كەسانی خاوەن پێداویستی تایبەت بە رێژەی 50% كەمدەكرێتەوە.
وەزارەتەكە لە راگەیەندراوێكدا دەڵێت، بڕیاردرا بە كەمكردنەوەی بلیتی فڕۆكە بۆ كەسانی خاوەن پێداویستی تایبەت بە بڕی 50% و دووجار لە ساڵێكدا، سەرەڕای دامەزراندنی هۆبەی چاودێریی كەمئەندامان و خاوەن پێداویستییە تایبەتەكان و یەكەی كارگێڕی خاوەن پێداویستییە تایبەتەكان لەسەرجەم فەرمانگەكانی وەزارەتدا.
بڕیارەكە بۆ جێبەجێكردنی یاسای چاودێریی كەمئەندامان و خاوەن پێداویستییە تایبەتەكان ژمارە (38)ی ساڵی 2013یە، وەك ئەوەی لە راگەیەندراوی وەزارەتەكەدا هاتووە.
ئاماژەی بەوەشدا كە تەرخانكردنی پلەی وەزیری بۆ كەمئەندامان بەپێی رێژەی دیاریكراو لە یاساكەدا (5%)، دەچێتە خانەی ئەرك و كارەكانی ئەنجومەنی خزمەتی فیدراڵی.
