وەزیری کشتوکاڵ و سەرچاوەکانی ئاوی هەرێمی کوردستان رایدەگەیەنێت، “زۆر خۆشحاڵم کە دەبینم بەهیمەتی جوتیاران و وەبەرهێنەران و وەزارەت، سیاسەتی بەهێزکردنی ئاسایشی خۆراک و گەشەی سێکتەری کشتوکاڵیمان لە هەرێم تا رادەیەکی بەرچاوو پێشخست”.
بێگەرد تاڵەبانی، وەزیری کشتوکاڵ و سەرچاوەکانی ئاوی هەرێمی کوردستان، دەستخۆشی لە جووتیارێکی پێنجوێن دەکات و دەڵێت، “بەتەنها جووتیارێکی قەزای پێنجوین، ساڵانە هەزار دۆنم زەوی دادەچێنێت بە بەروبوومەکانی پەتاتە، تەماتە، شوتی و خەیار، بەشێوەیەکی گشتیش 400 دۆنم زەوی لەو بڕە، بە بەرهەمی پەتاتە دەچێنێت لە جۆری شیرین”.
دەشڵێت، “ئەو جووتیارە، 450 تۆن بنەتۆوی پەتاتە دەچێنێت و توانای بەرهەمهێنانی 3 هەزار و 500 تۆن پەتاتەی هەیە، هەروەها ڕۆژانە و مانگانە لە کێڵگە کشتوکاڵیەکەیدا دەرفەتی هەلی کار بۆ زیاتر لە 100 کرێکاری ناوچەکە وەک سەرچاوەیەکی بژێوی ژیانیان دەڕەخسێنت”.
وەزیری کشتوکاڵی هەرێم جەخت لەوەش دەکاتەوە، “بەردەوامین لە زامنکردنی ئاسایشی خۆراک و پارێزگاری لە بەروبوومە خۆماڵییەکانی جووتیاران و دۆزینەوەی بازاڕی ئاسانکاری بۆ ساغکردنەوەیان”.
