ئەمڕۆ یەكشەممە، ئەحمەد داوود ئۆغلو سەرۆك وەزیرانی پێشووتری توركیا، سەرۆكی پارتی ئاییندە، سەردانی مەزاری سەرۆك مام جەلالی كرد و لەلایەن قوباد تاڵەبانی لێپرسراوی مەكتەبی سكرتارییەت، د. محەمەد سابیر سەرۆكی دامەزراوەی سەرۆك مام جەلال و ئەندامانی مەكتەبی سكرتارییەت پێشوازیكرا.
ئەحمەد داوود ئۆغلو دوای دانانی تاجەگوڵینەی رێز و وەفا لە دەفتەری یادەوەرییەكاندا بە رێزەوە باسی لە پەیوەندی دێرینی خۆی و سەرۆك مام جەلال كرد و ئاماژەی بۆ ئەوەكرد، ئەمڕۆ هاتم رێزی خۆم نیشانی هاوڕێكەمدا، وێنە جوانەكانی مام جەلال لە بیرماندا ماوە، مام جەلال هاوبەشی هەمووان بوو، تەنها هی سلێمانی و عێراق نییە، بەڵكو بۆ هەمووانە و ئەمڕۆ هاتم رێزی خۆمی نیشان بدەم، سلێمانیش وەكو زێدی من وایە و هاتنم بۆ ئێرە شەرەفێكی گەورەیە.
ئەحمەد داوود ئۆغلو وتیشی، “ئەركی من بوو بێم و سەردانی مەزارەكەی بكەم، دوایینجار كە وەك وەزیری دەرەوە هاتم زۆر نەخۆش بوو، بەداخەوە نەمانتووانی بیبینین بۆیە تەنها سەردانی هێرۆخانی هاوسەریمان كرد كە پێمان دەوت پورێ و راشیگەیاند، خانەوادەی سەرۆك مام جەلال خێزانی منن، قوباد تاڵەبانی وەك برام وایە و كاتێك بانگهێشتی كردم بۆ بەشداریكردن لە كۆڕبەندی دێڵفی لە سلێمانی تەنانەت دووجار بیرم نەكردەوە و گوتم بەڵێ.
لای خۆیەوە قوباد تاڵەبانی سوپاسی ئەحمەد داوود ئۆغلوی كرد و بە گرنگییەوە باسی لە پەیوەندی لەمێژینەی یەكێتی و پارتی ئاییندەی بەڕێزیانی كرد و هاتنیشی بۆ شاری سلێمانی بەرزنرخاند.
