بافڵ جەلال تاڵەبانی سەرۆکی یەکێتیی نیشتمانیی کوردستان رایگەیاند، پشتگیریی بەپارێزگابوونی هەڵەبجە دەکەن و هەڵەبجەییەکان قوربانیی زۆریان داوە و خوێنی رۆڵەکانیان لەبیر ناکەن.
ئەمڕۆ چوارشەممە بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد چاویکەوت بە سەید عەمار حەکیم سەرۆکی رەوتی حیکمە و لە دیدارێکدا جەخت لە بەردەوامیی گفتوگۆی بونیادنەرانەی نێوان لایەنە سیاسییەکانی هەرێم و عێراق کرایەوە بە ئامانجی زاڵبوون بەسەر ئاڵنگارییەکان، نەهێشتنی بەربەستەکانی بەردەم پرۆسەی سیاسیی بەتایبەت کێشەکانی نێوان هەرێم و بەغداد، لەو رووەشەوە داواکرا بەرژەوەندییە نیشتمانی و نەتەوەییەکان رەچاوبکرێت و هەموو لایەنەکان پشتیوانبن بۆ چارەسەری دەستووریانەی ئەو گرفتانەی پەیوەستن بە ژیان و گوزەرانی خەڵکەوە.
لەبارەی پێشهاتە ئەمنییەکان و بەزاندنی خاک و ئاسمانی وڵاتەوە، هەردوولا جەختیان لە یەکخستنی هەوڵە نیشتمانییەکان کردەوە لەپێناو رووبەڕووبوونەوەی هەر مەترسییەک کە ئاسایش و سەقامگیریی وڵات بخاتە مەترسییەوە، هەروەها ئیدانەی هێرشکردنە سەر دامەزراوە ئەمنییەکان کرا کە رۆڵێکی گرنگ و بەرچاویان هەبووە لە رووبەڕووبوونەوەی تیرۆر و پاراستنی ژیان و ئارامیی هاوڵاتییان.
پرسی بە پارێزگابوونی هەڵەبجە تەوەرێکی دیکەی دیدارەکە بوو و لەوبارەیەوە بافڵ جەلال تاڵەبانی رایگەیاند، “دەبێت مافە دەستوورییەکانی هەڵەبجە پارێزراو بێت و بەهەموو شێوەیەک پشتگیریی بەپارێزگابوونی دەکەین، هەڵەبجەییەکان قوربانیی زۆریان داوە و ئێمەش خوێنی رۆڵەکانمان لەبیر ناکەین”.
