دوای برینداربوونی لە شەڕێكدا كارمەندێكی پۆلیسی زاخۆ گیانیلەدەستدا.
ئەحمەد رەمەزان، وتەبێژی پۆلیسی زاخۆ لە لێدوانێكدا بۆ رۆژنامەنووسان رایگەیاند، ئێوارەی دوێنێ بەشی فریاكەوتنی پۆلیس لە رووداوێكی شەڕكردن لە یەكێك لە ھۆڵەكانی ئاھەنگێڕان ئاگاداركراوەتەوە.
دوای گەیشتنی تیمی پۆلیس و هەوڵدان بۆ كۆنتڕۆڵكردنی شەڕەكە، یەكێك لە كارمەندانی تیمەكە بەناوی (ئەیوب ئازاد زوبێر) برینداربووە و رەوانەی نەخۆشخانە كراوە، وتەبێژی پۆلیس وای وت.
وتیشی، لە نەخۆشخانە چارەسەری بۆ كراوە و رەوانە كراوەتەوە، بەڵام بەیانیی ئەمڕۆ تەندروستیی تێكچووە و دوای رەوانەكردنی بۆ نەخۆشخانە لەوێ گیانیلەدەستدا.
ئەحمەد رەمەزان ئەوەشی خستەڕوو، دۆسیەی یاسایی بۆ رووداوەكە رێكخراوە و چاوەڕوانی ئەنجامی پشكنینەكان دەكەن بۆ زانینی هۆكاری سەرەكیی گیانلەدەستدانی كارمەندەكەیان.
