تەڤگەری ئازادی کۆمەڵگەی کوردستان بڵاویکردەوە، دوور و نزیک تەقینەوەکەی هەولێر و ئەو کەسەی وەک ئەنجامدەر ناسێنراوە پەیوەندی بە ئەوانەوە نییە.
تەڤگەری ئازادی کۆمەڵگەی کوردستان لە راگەیەندراوێکدا بڵاویکردەوە، “پارتی لە ئەنجامی شکستی خۆی لە بەڕێوەبردنی هەرێمدا، دەیەوێت بە سیناریۆ و پاساو هێنانەوە ناڕەزایەتی و بایکۆتی فەرمانبەران و چین و توێژەکانی کۆمەڵگە بە لاڕێدا ببات”.
ئاماژەی بەوەشکرد، “لە دوای هاتنی هاکان فیدان و داڕشتنی کۆمەڵێک پیلانگێڕی بۆ دروستکردنی ئاژاوە و فیتنەگەری لە ناوچەکەدا بینیمان لە رۆژانی 1 و 2 ی مانگدا لە کەرکووک و دواتریش لە هەولێر سیناریۆیەکیان ئەنجامدا هەر لە سەرەتاوە خواستیان هەبوو رەوشی کەرکوک بخەنە ئەستۆی ئازادییخوازانی کەرکوو و ئامانجی بۆگەنیان پەردەپۆش بکەن، خۆشبەختانە بە هۆشیاری خەڵکی هەمیشە قوربانی کەرکوک سیناریۆکانیان ئاشکرا کرد”.
لەبەشێکی دیکەی راگەیەندراوەکەدا هاتووە، “لەم دۆخە نا سەقامگیر و بێ مافی و بێ مووچەییەی خەڵکدا هەمووان دەزانین هەر دێت ناڕەزایەتییەکان قووڵ دەبنەوە و بەڕووی دەسەڵاتدا و ستەمکارانی دەسەڵات ترسی تۆڵەی گەلیان لێنیشتووە لە بێچارەییدا، دەزگایەک بە ناو دەزگای ئاسایشی هەرێمی کوردستان، بە داتاشینی سیناریۆی بێ بنەما و چەواشەکارانە بەرامبەر بە تەڤگەری ئازادی کۆمەڵگەی کوردستان دەیانەوێت رای گشتی کوردستان بە لاڕێدا ببەن و تەڤگەرەکەمان تۆمەتبار بکەن”.
