ئەندامێكی ئەنجومەنی نوێنەرانی عێراق رایدەگەیەنێت، هاوپەیمانیی بەڕێوەبردنی دەوڵەت لاریی نییە لە ناردنی مووچە و بودجەی هەرێمی كوردستان بەپێی رێككەوتنەكان، بەڵام سوورن لەسەر هەڵوێستی خۆیان كە دەبێت وردبینی لە سەرجەم داهاتەكان بكرێت و رێكارە ژمێریاریی و داراییەكان جێبەجێبكرێن.
غەریب ئەحمەد ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای رایگەیاند، بەپێی زانیارییەكان، هاوپەیمانیی بەڕێوەبردنی دەوڵەت هیچ لاریی نییە لە ناردنی مووچە و بودجەی هەرێمی كوردستان بەپێی رێككەوتنەكان كە پێشتر ئەنجامدراوە و دواتر لە یاسای بودجەدا دەنگی لەسەر دراوە.
ئاماژەی بۆ ئەوەش كرد، هاوپەیمانیی بەڕێوەبردنی دەوڵەت سوورن لەسەر هەڵوێستی خۆیان و داوای جێبەجێكردنی رێكارە ژمێریاریی و داراییەكان دەكەن.
ئاشكراشیكرد، لە ماوەی رابردوودا شاندی هونەریی هەرێم كە سەردانی بەغدادی كردووە چەند كۆبوونەوەیەكیان لەبارەی خستنەرووی داتا و زانیارییەكانی تایبەت بە هەرێمی كوردستان ئەنجامداوە.
