ڕەجەب تەیب ئەردۆغان، سەرۆككۆماری توركیا دەڵێت، “دەمانەوێت پەیوەندییەكانمان لەگەڵ ئیسرائیل-دا باشترببن و لە بواری هەواڵگیرییدا پەیوەندییەکانمان لەگەڵ ئیسرائیل نەپچڕاون و بەردەوامن.”
ئەمڕۆ هەینی 25ی كانونی یەكەم و دوای ئەنجامدانی نوێژ لە مزگەوتی ئایا سۆفیا، ڕەجەب تەیب ئەردۆغان، سەرۆككۆماری توركیا لە وەڵامی پرسیاری ڕۆژنامەنووساندا باسی لە پەیوەندییەكانی وڵاتەكەی لەگەڵ ئیسرائیل-دا كرد و جەختیكردەوە كە دەیانەوێت پەیوەندییەكانیان لەگەڵ ئیسرائیل-دا باشترببن.
سەرۆككۆماری توركیا وتی، “لە بواری هەواڵگیرییدا پەیوەندییەکانمان لەگەڵ ئیسرائیل نەپچڕاون و بەردەوامن، بەڵام لەگەڵ چەند بەرپرسێکی باڵادا هەندێک کێشەمان هەیە، ئەگەر لەسەر ئاستی باڵا پرسگەلێك لەنێوانماندا نەبووبان، ئەوا پەیوەندییەكانمان تەواو جیاواز دەبوون.”
ئەردۆغان ڕاشیگەیاند كە هەڵوێستی ئیسرائیل لەبارەی خاکی فەلەستین-ـەوە پەسەند ناكەن و ئەوە خاڵی جیاوازی نێوان ئەوان و ئیسرائیلە و وتی، “ئەگەرنا، دڵمان دەخوازێت کە پەیوەندییەکانمان لەگەڵ ئیسرائیل-دا بگاتە دۆخێكی باشتر.”
ساڵی 2018 و بەهۆی ناكۆكییەكانیانەوە، توركیا و ئیسرائیل باڵیۆزەكانی یەكتریان دەركرد، بەڵام پەیوەندییە بازرگانییەكانیان بەردەوامن و هیچكات نەپچڕاون.
