بەڕێوەبەرایەتیی گشتیی تەندروستیی سلێمانی رایدەگەیەنێت، لە ماوەی مانگێكدا 928 منداڵ لەنەخۆشخانەی منداڵبوون لەدایكبوون.
بەپێی راگەیەندراوێكی بەڕێوەبەرایەتیی گشتیی تەندروستیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە ماوەی مانگی رابردوو (1 بۆ 2023/7/31) لە نەخۆشخانەی منداڵبوونی فریاكەوتنی فێركاری دوو هەزار و 780 نەخۆش سەردانیان كردووە و لەو ژمارەیە هەزار و 641 نەخۆش داخڵكراون و چارەسەری پێویستیان بۆ كراوە.
هەر لە راگەیەندراوەكەدا هاتووە، مانگی رابردوو 928 منداڵ لە نەخۆشخانەی منداڵبوونی فریاكەوتنی فێركاری لەدایكبوون و 495 منداڵیان كوڕبوون و 433 منداڵیان كچ بوون، لەو ژمارەیە 558 منداڵ بەشێوەی سروشتی لەدایكبوون و 370 منداڵ لە رێگای نەشتەرگەریی لەدایكبوون.
هاوكات لەمانگی رابردوودا لەنەخۆشخانەی منداڵبوونی فریاكەوتنی فێركاری 207 منداڵ لەبەشی نەبەكام داخڵكراون و 19 حاڵەتی لەدایكبوونی دووانە و 140 لەبارچوونی منداڵ تۆماركراون و هەروەها هەزارو 276 سۆنەریش گیراوە.
