وەزارەتی پێشمەرگە روونكردنەوە لەبارەی كڕینی ئەو خانووانە دەدات كە بۆ بریكاری وەزیر كڕدراون و دووپاتیشیدەكاتەوە كە ئۆتۆمبێلێكی پێدراوە.
وەزارەتی پێشمەرگە لە روونكردنەوەیەكدا رایگەیاند، چەند نوسراوێکی فەرمیی وەزارەت لە چەند پەیجێکدا بڵاوکراونەتەوە، دەربارەی کڕینی خانوو و ئۆتۆمبێل بۆ بریکاری وەزارەتی پێشمەرگە.
لەو بارەیەشەوە رایدەگەیەنێت:
1- ئەو دوو خانووەی لە نوسراوەکەدا باسکراون، موڵکی حکومەتن و بە ناوی کەسێکی تایبەتەوە نەکڕدراون.
وەک تەواوی ئەو خانووانەی تر بەکاردەهێنرێن، کە بەرێزان وەزیر و ئەمینداری گشتیی وەزارەتی پێشمەرگە لەئێستادا بەکاریاندەهێنن.
2- بریکاری وەزارەتی پێشمەرگە لە دەرەوەی یاسا و رێنماییەکان کارناکات، تەواوی ئەو فەرمانە وەزاریانەی، کە واژۆی لەسەر کردوون فەرمی و یاسایین.
3- لەمساڵدا ژمارەیەک ئۆتۆمبێل بۆ وەزارەتی پێشمەرگە کڕدراون لەناویاندا ئۆتۆمبێلێک دراوە بە بریکاری وەزارەتی پێشمەرگە.
4- دزەپێکردن و بڵاوکردنەوەی نوسراوە فەرمییەکانی وەزارەت و بڵاوکردنەوەیان لە دەزگاکانی میدیاییدا پێچەوانەی یاسا و رێنماییەکانە و، سەرپێچیکاران لەبەرامبەر یاسادا بەرپرسیار دەبن.
