بەهۆی رووداوەكانی سەر باڵیۆزخانەی سوید لە بەغداد، وەزارەتی بەرگریی ئەڵمانیا رەتكردنەوەی سەردانی وەزیرەكەی بۆ عێراق بەهۆكاری ئەمنی راگەیاند.
وەزارەتی بەرگریی ئەڵمانیا ئەمڕۆ رایگەیاند، سەردانەكەی بۆریس بیستۆریۆس-ی وەزیری بەرگری بۆ عێراق بۆ ماوەیەكی كاتی بەهۆی مەترسیی ئەمنییەوە رەتكراوەتەوە.
وەزارەتەكە هۆكارەكەشی بۆ ئەو كارە “توند و ئاژاوەگێڕانە” گەڕاندەوە كە دژ بە باڵیۆزخانەی سوید لە بەغداد ئەنجامدرا و بەهۆیەوە دەستەی فیدراڵی بۆ ریشەكێشكردنی تاوان لە ئەڵمانیا داوایكردووە سەردانەكە ئەنجامنەدرێت.
بەپێی هەڵسەنگاندنی دەستە ئەڵمانییەكان، ئەگەری روودانی ناڕەزایی دیكە و تێكچوونی بارودۆخ بەدوورنازانرێت، وەك ئەوەی وەزارەتی بەرگریی ئەڵمانیا ئاژماپەی پێداوە.
هەروەك بڕیارەكە لەهەمان كاتدا لەپێناو پاراستنی ئەندامانی تیمی باڵیۆزخانەی ئەڵمانیا لە بەغداد دراوە.
رووداوی سووتان و بێڕێزی بە قورئان لە سوید لەلایەن رەوەندێكی عێراقی لەو وڵاتە، زنجیرەیەك ناڕەزایی و خۆپیشاندانی لە عێراق و بەتایبەتیش لە بەغداد لێكەوتەوە، بەر لەوەی هەفتەی رابردوو خۆپیشاندەران هەڵبكوتنەسەر باڵیۆزخانەی سوید و بیسوتێنن.
