جواو فیلێکس داواکراوی یانەی بەرشلۆنەیە و ئەگەرەکان بەو ئاراستەیەن هەفتەی داهاتوو لەگەڵ یانە کەتەلۆنییەکە بە ڕێککەوتن بگات.
بەگوێرەی زانیارییەکانی تۆڕی “ڕیلیڤیۆ”، دوای ئەوەی جواو فیلێکس ڕایگەیاندووە، کە خەونی یاریکردنە بۆ یانەی بەرشلۆنە، بەرپرسانی ئەو یانەیە لەسەر ڕاسپاردەی چاڤی هێرناندێز دەستیان بە هەوڵدان کردووە بۆ واژۆکردنی گرێبەست لەگەڵیدا.
بارسا خاوەنی لیڤاندۆڤسکی، دێمبیلی، ڕافینیا، تۆرێس و ئانسو فاتی-یە، بەڵام چاڤی لاری نەبوونی نیشانداوە لە کڕینی جواو فیلێکس، پێیوابووە ئەو یاریزانە نابێتە زیادە و کوالێتی پێکهاتەکەی بەرزتر دەکاتەوە.
سەرچاوەکە نووسیویەتی، ئەگەر گرێبەستەکە واژۆبکرێت بەشێوازی خواستن دەبێت بۆ وەرزێک، لەگەڵ بژاردەی واژۆکردنی گرێبەستی هەمیشەیی لە مێرکاتۆی هاوینی 2024.
