لە شاری سلێمانی تۆمەتبارێک دەستگیرکرا کە بەناوی هەلی کارەوە دەستدرێژی کردبووە سەر دوو کچ و بڕێک پارەشی لێ وەرگرتوون.
بەڕێوەبەرایەتیی گشتیی بەرەنگاربوونەوەی توندوتیژی دژی ئافرەتان لە سلێمانی بڵاویکردەوە، دوو کچ سەردانی بەڕێوەبەرایەتییەکەیانی کردووە و سکاڵایان لەسەر کەسێک تۆمارکردووە کە دەستدرێژی کردبووە سەریان و پارەی لێوەرگرتبوون.
بەپێی راگەیەندراوەکە، تۆمەتبار (د. ب. ع) کە تەمەنی 35 ساڵە و خەڵکی دەرەوەی هەرێمی کوردستانە، ئەو کەسە بەناوی هەلی کارەوە کۆمپانیایەکی داناوە و لەو رێگەیەوە دەستدرێژیی کردووەتە سەر دوو کچ و پارەشی لێوەرگرتوون.
بەڕێوەبەرایەتیی بەرەنگاربوونەوەی توندوتیژی دژی ئافرەتان رایگەیاندووە کە ئەو کەسە دەستگیرکراوە و بەپێی ماددەی (393) لەسەر فەرمانی دادوەر راگیراوە.
