محەممەد شیاع سودانی سەرۆک وەزیرانی عێراق سبەینێ دووشەممە سەردانی میسر دەکات و تاوتوێی پەیوەندییەکان و هاوکارییەکانی نێوان هەردوو وڵات دەکات.
ئاژانسی هەواڵی فەرمیی عێراقی بڵاویکردەوە، “محەممەد شیاع سودانی، سبەی دووشەممە سەردانێکی گرنگ بۆ میسر دەکات”.
ئاماژەی بەوەشکرد، “ئامانجی سەردانەکە گفتوگۆکردنە لەسەر پەیوەندییە دووقۆڵییەکان و هاوکارییەکانی نێوان عێراق و میسر”.
مانگی ئازاری رابردوودا عەبدولفەتاح سیسی سەرۆکی میسر لەگەڵ سودانی لە رێگەی پەیوەندییەکی تەلەفۆنییەوە گفتوگۆیەکی ئەنجامدا سەبارەت بە رێگاکانی بەهێزکردنی چوارچێوەی هاریکاریی نێوان هەردوو وڵات و لە چوارچێوەی میکانیزمی سێ قۆڵی لەگەڵ ئوردن.
