بەڕێوەبەرایەتیی ئاسایشی رۆژئاوای سلێمانی دەستگیركردنی حەوت كەسی بە تۆمەت سحر و جاد و بەكارهێنان و بازرگانیكردن بە ماددەی هۆشبەرەوە راگەیاند كە ئەندامی یەك خێزانن.
دەزگای ئاسایشی هەرێمی كوردستان لە راگەیەندراوێكدا بڵاویكردەوە، لەسەر بنەمای كۆكردنەوەی زانیاری و چاودێری و بەدواداچوونی ورد، هێزەكانی بەڕێوەبەرایەتیی ئاسایشی رۆژئاوای سلێمانی بە فەرمانی دادوەری دادگای لێكۆڵینەوە لە 25ی ئایاری ئەمساڵدا لە قەزای چەمچەماڵ حەوت كەسیان لە ئەندامانی خێزانێك دەستگیركرد، كە هەستاون بە ئەنجامدانی سحر و جاد و نوشتە لە هاوڵاتییان بە رێگای جیاواز بۆ مەبەستی جیاواز.
لە راگەیەندراوەكەدا هاتووە، لە كاتی دەستگیركردنی تۆمەتبارەكاندا دەستگیرا بەسەر بڕێكی زۆر لە ماددەی هۆشبەر لە جۆری (حەشیش و كریستاڵ)، بەفەرمانی دادوەری دادگای لێكۆڵینەوە دەستبەسەر سەرجەم ئەو كەلوپەل و كەرەستە و وێنانەدا گیرا كە جادو و سحر و نوشتەیان پێوەدەكرد.
هەر لەراگەیەندراوەكەدا هاتووە، لە ئێستادا تۆمەتبارەكان بە ماددەی 25 لە یاسای بەرەنگاربوونەوەی ماددە هۆشبەر و كارتێكەرە عەقڵییەكان راگیراون و لێكۆڵینەوە لە دۆسیەكانیان بەردەوامە.
