پزیشکێکی پسپۆڕی منداڵان رایدەگەیەنێت، بەهۆی نەبارینی بارانەوە پەتایەکی قورس لەناو منداڵاندا بڵاوبووەتەوە و داوا دەکات دایکان و باوکان منداڵانی خوار تەمەن یەک ساڵان و ئەوانەی نەخۆشی درێژخایەنیان هەیە بپارێزن.
د. پشدەر عەبدوڵا پزیشکی پسپۆڕی نەخۆشییەکانی منداڵان رایگەیاند، پەتایەکی زۆر قورس بڵاوبووەتەوە بە تایبەت لەناو منداڵاندا، راستە نیشانەکانی هەر (لە تای بەرز و کۆکە و خیزە و سەرئێشەو هەندێکجار چاو ئێشە و سکچوون و رشانەوە) زۆر قورسن، بەڵام بەشی هەرە زۆرییان ڤایرۆسییە.
باسیلەوەشکرد، بەهۆی ئەوەی بارانبارین دواکەوتووە و ئاو و هەواش وشک و ساردە، ژینگەیەکی لەباری بۆ ڤایرۆسەکان دروستکردووە کە بەخێرایی گەشەبکەن و بڵاوببنەوە هەروەها سیستمی بەرگری لووتیش لە ئاو و هەوای وشک و سارددا بۆ کەمتر لە نیوە دادەبەزێت، مرۆڤ بە ئاسانی تووش دەبێت، لەبەرئەوەی دەرگای خوێندنگاکان کراونەتەوە و خوێندن دەستیپێکردووەتەوە بەریەککەوتن زۆرە و زۆر بە ئاسانی دەگوازرێتەوە، چاوەڕوانکراوە تا بارانبارین ئەو پەتا تووندە بەردەوام بێت.
داوایشیکرد، بەبێ پرس و راوێژی پزیشکی پسپۆڕی منداڵان بە تایبەت دەرمانی دژە بەکتریا مەدەن بە منداڵەکانتان، چونکە نەک سوودی لێنابینێت، بەڵکو ماکی زۆر و زیانی تەندروستیشی هەیە، ئەو دایک و باوکانەی منداڵی خوار تەمەن یەک ساڵانیان هەیە یان منداڵەکانیان نەخۆشی درێژخایەنیان هەیە لە تووشبوون بەم پەتایە بیانپارێزن، چونکە مەترسیی لەسەر ژیانیان دروستدەکات.
