بەهۆی پێکدادانی سێ شەمەندەفەر لە ویلایەتی ئۆدیشای هیندستان زیاتر لە 50 کەس گیانیان لەدەستدا و زیاتر لە 300 کەسیش برینداربوون.
هیندستان تایمز بڵاویکردەوە، رووداوەکە ئێوارەی ئەمڕۆ لە نزیک شاری بالاسۆری ویلایەتی ئۆدیشا روویداوە، بەپێی زانیارییە سەرەتاییەکان، سەرەتا دوو شەمەندەفەری نەفەرهەڵگر تووشی پێکدادان بوون و لە رێڕەوەکانیان لایانداوە، دواتر شەمەندەفەری سییەم خۆی پێیاندا کێشاوە.
تیمە فریاگوزارییەکانی ئەو ناوچەیە ئاشکرایانکردووە کە ترسیان لەوە هەیە کە زۆرێک لە سەرنشینەکان لەناو رێڕەو و شەمەندەفەرە زیانلێکەوتووەکاندا گیریان خواردبێت، لەکاتێکدا هەوڵەکان بۆ رزگارکردنیان هێشتا بەردەوامن.
بەپێی ئامارە سەرەتاییە ئاشکراکراوەکان، ژمارەی مردووەکان تا ئێستا زیاترە لە 50 کەس و زیاتر لە 300 کەسیش برینداربوون.
