سەركردەی لایەنێكی شیعەكان هەڕەشە لە ئەمریكا دەكات و دەڵێت، “خوێنی سەركردەكانی سەركەوتن بەفیڕۆ ناچێت و ئەمریكا دەردەكەین.”
فالح خەزعەلی، جێگری سەرۆكی فراكسیۆنی “سەنەدی نیشتمانی” ئەمڕۆ دووشەممە 21ی كانونی یەكەم ڕایگەیاند، “خوێنی سەركردەكانی سەركەوتن و سەركردەكانی شەهیدان بەفیڕۆ ناچێت و نهێنیی سەركەوتنە بەسەر تیرۆر و پرۆژە دەرەكییەكاندا.”
خەزعەلی لە لێدوانێكی ڕۆژنامەوانییدا جەختیكردەوە كە ئامانجی ئەوان بۆ تۆڵەكردنەوەی خوێنی سەركردەكان (وەك ئاماژەیەك بۆ ئەبو مەهدی موهەندس و قاسم سلێمانی) دەركردنی ئەمریكا-یە لە عێراق.”
وتیشی، “هەر كەمتەرخەمی و دەستی دەستیپێكردنێكی حكومەتی عێراق لە دیاریكردنی وادەیەك بۆ كشانەوەی هێزەكانی ئەمریكا، سپڵەییە بەرانبەر بە سەركردەكانی سەركەوتن. پەرلەمان لەنزیكەوە كار بۆ دەركردنی هێزە بیانییەكان و لەسەرووی هەمووشیانەوە ئەمریكا دەكات و هەر لایەنێك هەوڵبدات خۆی لەو ئەركە بدزێتەوە، لێپێچینەوەی لەگەڵدا دەكەین.”
دوێنێ یەكشەممە 20ی كانونی یەكەم، پێنج موشەكی كاتیۆشا نران بە باڵیۆزخانەی ئەمریكا لە بەغداد و سیستمی بەرگریی باڵیۆزخانەكە تێكیشكاندن، ئەوەش یەكەمجار نییە هێرشبكرێتە سەر باڵیۆزخانەكە و ئەمریكا-ش بەشێك لە گرووپە شیعەكان بەوە تۆمەتبار دەكات.
