قوباد تاڵەبانی جێگری سەرۆك وەزیران لە ساڵڕۆژی كۆچی دوایی نەوشیروان مستەفادا پەیامێكی بڵاوكردووە و رایدەگەیەنێت، “كاك نەوشیروان، ناوێكی هەمیشە زیندوو و سیاسییەكی دەگمەن لە مێژووی گەلی كورددا، ئەو لە یەككاتدا لە چەندین كایەی جیاوازدا دیار و هەڵكەوتوو بووە، هەم لە بوارە مەیدانییەكەی سیاسەتدا كەسێكی بە توانا و شارەزا بوو، هەم لە بواری تیۆرییشدا؛ لێهاتوو و خاوەن بیرێكی دەگمەن بوو، خوێندەوار و رۆشنبیر، ئازا و چاونەترس بوو”.
دەشڵێت، “هەمووان شایەتی ئەوە دەدەن كە هەوڵ و تێكۆشانەكانی كاك نەوشیروان، تەنها لەپێناو كورد و كوردستاندا بوو، بۆیە هەر كوردێك لە هەر شوێنێك بێت و لەسەر هەر بیروباوەڕێك و ئایدۆلۆژیایەك بێت، كاكە نەوە لەیاد ناكات و هەموو كات ناوی لە مێژووی نەتەوەكەماندا، درەوشاوەیە”.
