پاش فڕێدانی منداڵێكی ساوا لە كەلار، هێزەكانی پۆلیسی گەرمیان سێ كەس دەستگیردەكەن كە یەكێكیان دایكیەتی.
بەڕێوەبەرایەتیی پۆلیسی گەرمیان رایگەیاند، دوای ئەوەی لە 24ی ئەم مانگە لە نزیک مزگەوتی تەقوای قەزای کەلار منداڵێکی تازەلەدایکبوو لە رەگەزی نێر لەنێو کارتۆنێکدا دۆزرایەوە، دەستیان لە لێكۆڵینەوە كرد و بە سوودبینین لە کامێرای چاودێری، توانیان تۆمەتباران کە لە سێ كەس پێکهاتوون دەستگیربکەن.
دوای لێکۆڵینەوە لەگەڵ دایکی منداڵەکه کە لەدایکبووی ساڵی 1988 و دانیشتووی قەزای کەلارە، دانیبەوەدانا کە منداڵی ئەوە و دوای لەدایکبوونی بەهاوکاری دوو تۆمەتباری دیكە کە پیاوێک و ژنێكن و خزمی باوکی منداڵەکەن، ساواكەیان لە نزیک مزگەوتی ناوبراو بەجێهێشتووە، وەك ئەوەی پۆلیسی گەرمیان ئاماژەی پێداوە.
دەشڵێت، تۆمەتباران بەپێی ماددەی 383 بەندکراون و لێکۆڵینەوە لەگەڵیاندا بەردەوامە، دادوەر فەرمانی دەستگیرکردنی بۆ تۆمەتبارێکی دیكەش دەرکردووە.
