بومەلەرزەیەك لە خانەقین روویدا و زیانی گیانیی لێنەكەوتووەتەوە.
بەیانیی ئەمڕۆ چوارشەممە، بومەلەرزەیەك بە گوڕی 4.3 پلە بە پێوەری رێختەر و بە قووڵایی 12 كیلۆمەتری ژێرزەوی لە قەزای خانەقین روویدا. محەمەد حەسەن شارەزای بومەلەرزەزانی دەڵێت، “چەقی بومەلەرزەكە سنووری نێوان عێراق و ئێران بووە و بەشێك لە دانیشتووانی خانەقین هەستیانپێكردووە”.
ئەو شارەزایەی بومەلەرزەزانی ئاماژەی بۆ ئەوەش كردووە كە بەهۆی كەمی و سووكیی گوڕی بومەلەرزەكەوە، زیانی لێنەكەوتووەتەوە و كەس نەبووە بە قوربانی.
لە ماوەی ئەمساڵدا شەشەم جارە بومەلەرزە لە سنووری قەزای خانەقین رووبدات و شارەزایانی بواری جیۆلۆجی، هۆكارەكەی بۆ ناسەقامگیریی پلێتەكانی زەوی دەگەڕێننەوە.
