بەڕێوەبەرایەتیی هاتوچۆی گەرمیان رادەگەیەنێت، بەهۆی وەرگەڕانی ئۆتۆمبێلێكی جۆری جێب واز لە گوندی قاسماغە دوو مێردمنداڵ برینداربوون.
بەپێی راگەیەندراوێكی بەڕێوەبەرایەتیی هاتوچۆی گەرمیان كە وێنەیەكی دەست تۆڕی میدیایی ئێستا كەوتووە و تێیدا هاتووە، پاشنیوەڕۆی ئەمڕۆ سێشەمە لە گوندی قاسماغە ئۆتۆمبێلێكی جۆری جێب واز وەرگەڕا و بەهۆیەوە شۆفێرەكە و سەرنشینێك برینداربوون كە هەردووكیان بران و لەدایكبووی ساڵی 2010 و 2011 بوون.
لە راگەیەندراوەكەدا هاتووە، دوای رووداوەكە بریندارەكان گواسترانەوە بۆ نەخۆشخانەی فریاكەوتنی شەهید هەژار لە كەلار و پاش وەرگرتنی چارەسەری پێویست ڕەوانەی نەخۆشخانەی سلێمانی كران و تیمی هاتوچۆش لێكۆڵینەوەی لە رووداوەكە دەستپێكردووە.
