پۆلیسی گەرمیان، دەستگیركردنی ئەو دوو تۆمەتبارەی راگەیاند كە یەكەم رۆژی جەژن لەسەر ماتۆڕسکیلەوە بە گولـلە کەسێکیان بریندارکردبوو.
عەقیدی مافپەروەر عەلی جەمال قەدووری وتەبێژی پۆلیسی گەرمیان بە ئێستای راگەیاند، “لە یەکەم رۆژی جەژندا لە گەڕەکی شەهیدانی قەزای کەلار و لە نزیک نەخۆشخانەی شێرەی نەقیب، دوو تۆمەتبار لەسەر ماتۆڕسکیلەوە تەقەیان لە سێ گەنج کرد و یەکێکیانیان برینداركرد و لەو كاتەوە گەڕان بەدوای تۆمەتبارەكاندا دەستیپێكرد”.
وتیشی، “بەڕێوەبەری پۆلیسی گەرمیان، بەڕێوەبەری بەشی پۆلیسی کەلاری راسپارد کە هەوڵی تەواو بدەن بۆ دەستگیرکردنی تۆمەتباران و دوای لێکۆڵینەوە و بەدواداچوون، ئەمڕۆ سێشەممە هەردوو تۆمەتبارەكە دەستگیركران”.
لە لێدوانەكەیدا بۆ ئێستا، وتەبێژی پۆلیسی گەرمیان رایگەیاند، لە ئێستادا هەردوو تۆمەتبارەكە بەپێی ماددەی 405\31 بەندکراون و لە بەشی پۆلیسی کەلار لێکۆڵینەوەیان لەگەڵدا دەكرێت.
