لەلایەن مامۆستایەکی زانکۆی سلێمانی کتێبێکی تایبەت بە شوێنەوار و کەلتوور بە زمانی ئینگلیزی لە وڵاتی ئەڵمانیا چاپ و بڵاوكرایەوە.
پ.ی.د. دڵشاد عەزیز مارف، مامۆستا لە بەشی شوێنەواری کۆلێجی زانستە مرۆڤایەتییەکانی زانکۆی سلێمانی کتێبی (Cultural Interaction between Assyria and the Zagros ) لە وڵاتی ئەڵمانیا بە زمانی ئینگلیزی، لە دەزگای (Ugarit-Verlag) کە یەکێکە لە بەناوبانگترین دەزگای چاپ و پەخشی ئەکادیمی تایبەت بە شوێنەوار و زمانە دێرینەکانی خۆرهەڵاتی دێرین، لە دوو توێی 600 لاپەڕەدا چاپ و بڵاوكردەوە.
کتێبەکە دابەشکراوە بەسەر چوار بەشی سەرەکی و كەلتووری مادی و نامادی و هۆکارەکانی کارلێکی کەلتووری و پەیوەندیی شارستانی چیانشیان و دەشتنیشنان، هۆکارەکانی جەنگ و پێکدادانی بەردەوامی ئەم دوو کەلتوورەش خراونەتە بەرباس و لێکۆڵینەوە.
رێبازی توێژینەوە و کارکردن لەم بەرهەمەدا پێکهاتووە لە رێبازێکی تێکهەڵکێش لە پشتبەستن بە بەڵگە شوێنەوارییەکان، دەقە مێخییەکان و دەقە دێرینەکانی دیكە، دیمەنە هونەرییەکان، تۆمارە مێژووییەکان و مێژووی زارەکی و کاری مەیدانی و گەڕان و بەراوردکاری، خوێندنەوە بۆ سروشت و کاریگەرییەکانی، کردە سیاسی و سەربازییەکان، کۆمەڵگە و کۆمەڵناسی ئەو کۆمەڵگە دێرینانە، بەراوردیان بە ژیانی لادێ و شارەکانی چەند دەیە و سەدەیەک لەمەوبەر، وەك ئەوەی زانكۆی سلێمانی بڵاویكردووەتەوە.
دەشڵێت، ئەم رێبازە تێکهەڵکێشە، یەکەمجارە بەو وردییە کاری لەسەر دەکرێت.
