پێنج پێشمەرگەی فەوجەكەی عەبدوڵڵای كوێخا موبارەك لە پردێ دەستگیركران و كەمێك لەمەوبەر ئازادكران.
عەقید عەلی كەمال بەڕێوەبەری پۆلیسی پردێ بە تۆڕی میدیایی ئێستای راگەیاند، ئەو پێنج پێشمەرگەیە ئۆتۆمبێلێكی بێسەرەتایان پێبووە و لەناو ناحیەی پردێ-ـدا سووڕاونەتەوە، پاشان بەنیازبوون سەردانی بنكەی تەندروستیی ناحیەكە بكەن و لەو كاتەدا هێزێكی چەكدارانی حەشدی شەعبی دەستگیریانكردوون.
وتیشی، دواتر حەشدی شەعبی ئەو پێشمەرگانەی رادەستی سوپای عێراق كردووە و ئەوانیش رادەستی دژەتیرۆری عێراقیان كردوون.
عەقید عەلی كەمال لەبارەی هۆكاری دەستگیركردنی ئەو پێشمەرگانەوە ئاشكرایكرد، “گومانكراوە ئۆتۆمبێلەكەیان بێسەرەتا بێت و تاوانی كوشتنی پێئەنجامدرابێت، بۆیە پێشمەرگەكان دەستبەسەركران بۆ ئەوەی لێكۆڵینەوە لەبارەی ئۆتۆمبێلەكەیانەوە بكرێت”.
بەڕێوەبەری پۆلیسی پردێ راشیگەیاند، دوای لێكۆڵینەوە بێبەریبوونی پێشمەرگەكان لەو دۆسیانە سەلمێندراوە و كەمێك لەمەوبەر ئازادكراون.
