لیژنە هاوبەشەکانی قائیمقامیەتی سلێمانی دوکانێکی شاورمەیان داخست کە شاورمەی رۆژانی پشووی فرۆشتووە و پەڕی مریشک بەسەر مریشکە برژاوەکانەوە بووە.
قائیمقامیەتی سلێمانی ئەمڕۆ چوارشەممە بڵاویکردەوە، “بەهۆی کارنەکردن بە رێنماییە تەندروستییەکان لیژنە هاوبەشەکان شاورمە و پیتزای (مستەر شاورمە)یان لە بەکرەجۆ داخست”.
ئاماژەی بەوەش کرد، “بەپێی راپۆرتی لیژنەی رۆژهەڵاتی بەکرەجۆ، ئەو شاورمەیە پابەندی مەرجە تەندروستییەکان نەبووە و پەڕی مریشک بەسەر مریشکە برژاوەکانەوە بووە و خواردنی رۆژانی پێشتری فرۆشتووە”.
بە بڕیاری قائیمقامی سلێمانی ئەو شاورمەیە داخراوە و تەواوی رێکارە یاساییەکان لەگەڵ خاوەنەکەی دەگیرێتەبەر.
