قائیمقامیەتی سلێمانی ئاشکرایکرد، سلێمانی ئامادەیی تەواوی هەیە بۆ لەخۆگرتنی پاڵەوانێتیی کۆنیفا، توانای لەخۆگرتنی گەشتیار و هاندەری وەرزشیی مۆندیالەکەی هەیە.
لە راگەیەندراوێکدا ئاوات محەمەد قائیمقامی سلێمانی رایگەیاند، پێشوازییان کردووە لە شاندێکی (کۆنیفا) یەکێتی تۆپی پێی هەرێمەکان و کۆبوونەوەیان لەبارەی بەڕێوەچوونی مۆندیالی هەرێمەکان ئەنجامدا.
بەپێی راگەیەندراوەکە، قائیمقامی سلێمانی کورتەیەکی لەسەر بوارەکانی مێژوو، کلتور، وەرزش، گەشتوگوزار و بوارەکانی دیکەی شاری سلێمانی بۆ میوانەکان باسکرد.
راشیگەیاند، شاری سلێمانی پێشوازی لە بەرێوەچونی جامی جیهانی هەرێمەکان دەکات و شارەکە توانای لەخۆگرتنی ئەو گەشتیار و هاندەرە وەرزشییانەی هەیە کە سەردانی سلێمانی دەکەن.
قائیمقامی سلێمانی هیواشی خواست، پاڵەوانێتییەکە بەسەرکەوتویی بەڕێوەبچێت، وتیشی، “ئێمەش وەکو حکومەت و لایەنی پەیوەندیدار بە وەرزش هەموو شێوەیەک ئاسانکاریی بۆ بەڕێوەچونی جامی جیهانی هەرێمەکان له كوردستان دەکەین”.
