جێگری سەرۆكی رێكخراوی یەكێتیی مامۆستایانی كوردستان رایدەگەیەنێت، حكومەت داهاتی زۆرە و دەتوانێت لەكاتی خۆیدا مووچە بدات، بەڵام بێباكە بەرامبەر بە مووچەخۆران و دەشڵێت، “بەم سیاسەتەی ئێستای حكومەت ئەمساڵ چەند مووچەیەكی مامۆستایان و فەرمانبەران دەفەوتێت”.
عەتا ئەحمەد جێگری سەرۆكی رێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای راگەیاند، حكومەت بێباكە بەرامبەر بە مووچەخۆران نرخی نەوت بەرزە و داهاتی ناوخۆش زۆرە، بەڵام مووچە لەكاتی خۆیدا دابەشناكات لەكاتێكدا پێشتر راگەیەندرا لە سەرەتای ئەم مانگەوە داهاتی پێویست لەبەردەستدابووە و حكومەت مووچە بە مەبەست دابەشناكات.
بە بڕوای بەرپرسەكەی یەكێتیی مامۆستایانی كوردستان بەم سیاسەتەی ئێستای حكومەت ئەمساڵ چەند مووچەیەكی مامۆستایان و فەرمانبەران دەفەوتێت و جگەلەوەی پلەبەرزكردنەوەش راگیراوە و كە مانگانە لێبڕینێكی شاراوەش لەسەر مووچە پەیڕەودەكرێت.
