پیاوێکی جەزائیری بەمەبەستی ئەنجامدانی عومرە لەگەڵ دوو هاوڕێیدا روویکردە وڵاتی سعودیە بەڵام بەهۆی دروستبوونی کێشە لەگەڵیاندا هەردووکیانی کوشت.
میدیا عەرەبییەکان بڵاویانکردەوە، “دوێنێ دووشەممە پۆلیسی سعودیە هاوڵاتییەکی بە رەگەز جەزائیریان لە شاری مەککە دەستگیرکردووە کە تۆمەتباربووە بە کوشتنی دوو هاوسەفەری خۆی”.
ئاماژەیان بەوەش کرد، “تۆمەتبارەکە بەمەبەستی ئەنجامدانی عومرە لەگەڵ دوو هاوڕێیدا گەشتیان بۆ سعودییە کردووە و لە یەکێک لە هۆتێلەکانی شاری مەککە ناکۆکی لەنێوانیاندا دروستبووە، هەردوو هاوڕێكەی بە سەختی بریندارکردووە و هەڵاتووە”.
ئاشکراشیکرد، “تا بەرپرسانی هۆتێلەکە گەیشتوونەتە سەر بریندارەکان گیانیان لەدەستداوە، تۆمەتبارەکەش رەوانەی لای داواکاری گشتی کراوە بەمەبەستی ئەنجامدانی رێکاری یاسایی بەرامبەری”.
