دەرگای ناونووسین بۆ مووچه‌ی چاودێریی كۆمه‌ڵایه‌تی ده‌كرێتەوە و چەند توێژێك مووچەیان بۆ دەستەبەردەكرێت.
بڕیارە رۆژی دووشه‌ممه‌ی داهاتوو، وەزارەتی كار و كاروباری كۆمەڵایەتیی عێراق، ده‌رگای ناونووسین بۆ مووچه‌ی چاودێریی كۆمه‌ڵایه‌تی بكاتەوە و هاوڵاتییانی ناوچە كوردستانییەكانی دەرەوەی ئیدارەی هەرێمیش لەو بڕیارە سوودمەند دەبن.
بەپێی بڕیاری وەزارەتی كار و كاروباری كۆمەڵایەتیی عێراق، جگە لە كەسانی كەمدەرامەت، كچانی گەورەتەمەن، منداڵانی بێباوك، ئەو ژنانەی هاوسەرەكانیان مردوون و ئەوانەشی لە هاوسەرەكانیان جیابوونەتەوە مووچەیان بۆ دەستەبەردەكرێت.
پێشتر سەنا موسەوی راوێژكاری سەرۆك وەزیرانی عێراق رایگەیاندبوو، لە پڕۆژەیاسای بودجەی ساڵی 2023ـدا بڕگەیەك بۆ دابینكردنی مووچە بۆ خوێندكاران دیاریدەكەن و وتبووی، “ئەگەر ئەو بڕگەیە جێگیربكرێت، ئەوا خوێندكارانی بنەڕەتی و ئامادەیی 30 هەزار دیناری مانگانە و خوێندكارانی زانكۆ و پەیمانگەكانیش مانگانە 70 هەزار دیناریان پێدەدرێت”.
