بەڕێوەبەرایەتیی پۆلیسی هەولێر لەبارەی کوژرانی گەنجێک لەلایەن ماڵی خەزورییەوە روونکردنەوەیەکی بڵاوکردەوە و رایگەیاندووە کە پێنج گوللـەی بەرکەوتووە و بەهۆیەوە گیانیلەدەستداوە.
لە راگەیاندراوی پۆلیسی هەولێردا هاتووە، “شەوی رابردوو دوای ئەنجامدانی ڕووداوێکی تەقەکردن لە گەڕەکی سەربەستی، دەستبەجێ هێزەکانی بەڕێوەبەرایەتیی پۆلیسی پارێزگای هەولێر گەیشتنە شوێنی رووداوەکە، دەرکەوت کە هاوڵاتییەک بەناوی (فەرمان عبدالخالق صالح) تەمەن 32 ساڵ، لەلایەن ماڵی خەزورانیه‌وه تەقەی لێکراوە”.
ئاماژە بەوەکراوە کە هۆکارەکەی کێشەی کۆمەڵایەتی بووە و پێنج گوللـەی بەرکەوتووە، دوای ئەوەی بە برینداری گەیەندراوەتە نەخۆشخانە بەهۆی سەختی برینەکەیەوە گیانیلەدەستداوە.
سەبارەت بەو لایەنەی تاوانەکەی ئەنجامداوە پۆلیسی هەولێر دەڵێت، ماڵی خەزوری ئەو گەنجە تەقەیان لێکردووە، تەقەکەرەکەش ناوی (ب. ر. ز.)ـەیە و پەڕاوی لێکۆڵینەوە بۆ رووداوەکە کراوەتەوە.
