سەرۆكی یەكێتی رایدەگەیەنێت، بەڵێن دووپاتدەکەینەوە بۆ هەمیشە پارێزەری ئارامی و ئاسایشی خاکە خۆشەویستەکەمان دەبین و دەشڵێت، رێگە بەهیچ کەسێک نادەین ژیان و سەقامگیریی خەڵک تێکبدات.
بافڵ جەلال تاڵەبانی، سەرۆکی یەکێتیی نیشتمانیی کوردستان پەیامێكی بەبۆنەی بیستەمین ساڵیادی شەهیدبوونی سەرکردەی تێکۆشەر شەوکەتی حاجی موشیر و هەردوو فەرماندە (حیکمەت حاجی عوسمان و سەردار غەفوور سلێمان) بڵاوكردەوە و رایگەیاند، بەڕێزەوە یادی جوامێری و قارەمانێتی ئەو رۆڵە بەئەمەکانەی نیشتمان دەکەینەوە.
بافڵ جەلال تاڵەبانی وتیشی، “کاک شەوکەت نموونەی شۆڕشگێڕی دڵسۆز و وەفاداری کوردستان و یەکێتیی نیشتمانیی کوردستان بوو، بەو ئازایەتی و نەبەردییەی لە بەرەی پێشەوەی شەڕەکاندا تۆماریکردبوو، ببووە جێگەی متمانەی سەرۆک مام جەلال. ئەو فەرماندەیەک بوو کە هەرگیز لە بەرپرسیارێتی راینەدەکرد و بە ئەوپەڕی ورەوە رووبەڕووی مەترسییەکان دەبووەوە و دواجار هەر لەو پێناوەشدا گیانی پیرۆزی بە کوردستان و خەڵکەکەی بەخشی”.
سەرۆكی یەكێتی ئەوەشی خستەڕوو، لەم یادە شکۆدارەدا بەڵێن بۆ رۆحی شەهیدان و خەڵکە خۆشەویستەکەمان دووپاتدەکەینەوە کە بۆ هەمیشە پارێزەری ئارامی و ئاسایشی خاکە خۆشەویستەکەمان دەبین و رێگە بەهیچ کەسێکیش نادەین ژیان و سەقامگیریی خەڵکەکەمان تێکبدات.
