بەیانی ئەمڕۆ تەقینەوەیەک لە یەکێک لە مزگەوتەکانی شاری پیشاوەری پاکستان روویدا و بەپێی ئامارە سەرەتاییەکان 20 کەس کوژراون و 95 ی دیکەش برینداربوون.
میدیاکانی پاکستان بڵاویانکردەوە، “ئەمڕۆ لە کاتی نوێژی بەیانی لە مزگەوتێکی شاری پیشاوەر کە زیاتر لە 150 نوێژخوێنی تێدابووە، تەقینەوەیەکی بەهێز روویداوە و تائێستا 20 کەس گیانیانلەدەستداوە و 95 کەسیش بە برینداریی گەیەندراونەتە نەخۆشخانە”.
ئاماژەیان بەوەش کرد، “زۆرینەی بریندارەکان لە هێزە ئەمنییەکانن و برینی زۆرینەیان سەختە”.
هەرچەندە تائێستا هیچ لایەنێک بەرپرسیارێتیی خۆی لە رووداوەکە رانەگەیاندووە، بەڵام لەدوای رووداوەکە هەر زوو پەنجەی تۆمەت بۆ بزووتنەوەی تاڵیبانی پاکستانی درێژکرا، کە بەرپرسیاری ژمارەیەک کردەوەی دیکەی تیرۆرستین لە وڵاتەکەدا.
