چیرۆكی رووخاندنی گوندی عەراقیب لە فەڵەستین لە لایەن هێزەكانی ئیسرائیلەوە درێژەی هەیە، ئەمڕۆ بۆ 212ـیەمین جار خاپووركرا، چیرۆكێك كە رابردووی وای نیشاندەدات لە داهاتووشدا بەردەوامبێت.
گوندی “عەراقیب” لە باشووری فەڵەستینە و ماوەی دەیان ساڵە جێگەی ناكۆكیی فەڵەستینی و ئیسرائیلییەكانە، ئەمڕۆ سێشەممە بۆ 212ـیەمین جار لە لایەن هێزەكانی ئیسرائیلەوە خاپووركرا و هەردوولا خاكەكەی بە موڵكی خۆیان دەزانن.
عەراقیب لە 22 ماڵ پێكهاتووە و خانووەكانی لە دار و تەختە و پلاستیك و چادر دروستكراون، گوندەكە لەسەر ئەو زەوییانە بنیادنراوە كە بە 48 ناسراون و ساڵی 1948 لە كاتی دامەزراندنی دەوڵەتی ئیسرائیل-دا، كەوتوونەتە سنووری ئەو وڵاتەوە و فەڵەستینییەكان و ئیسرائیلییەكانیش بە خاكی خۆیانیانی دەزانن، ئەوەش وایكردووە ئیسرائیلییەكان جار دوای جار خاپووریبكەن و فەڵەستینییەكانیش هەموو جارێك گوندەكە بنیادبنێنەوە.
سەرباری ئەوەی لە هەفتاكانی سەدەی ڕابردوودا ئیسرائیل 1250 دۆنم زەویی داوەتەوە بە فەڵەستینییەكان، بەڵام ساڵی 2000 زنجیرەی خاپووركردنی گوندی عەراقیب دەستیپێكردووە و تا ئێستا بەردەوامە.
