لە ئەنجامی لێچوون و پەنگخواردنەوەی غازدا، تەقینەوە لەناو ماڵێكی ناحیەی تەكیە روویدا و برینداربوونی كەسێك و رووخانی بەشێكی خانووەكەی لێكەوتەوە.
مەمەند رەشید بەڕێوەبەری ناحیەی تەكیەی كاكەمەند بە تۆڕی میدیایی ئێستای راگەیاند، بەرەبەیانیی ئەمڕۆ پێنجشەممە لە ماڵێكی ناحیەكە كاتێك كابانی خانەوادەكە سەرگەرمی ئامادەكردنی نانی بەیانی بووە، تەقینەوەیەك روویداوە.
روونیكردەوە، بەهۆی لێچوونی غازەوە ئاگر و تەقینەوە لە ماڵەكەدا روویداوە و كابانی ماڵەكە بە سووكی برینداربووە، بەشێكی خانووەكەشیان رووخاوە و زیانێكی زۆری ماددی بەر كەرەستەكانی ناوماڵەكە گەیشتووە.
