بانكی نێودەوڵەتی نیگەرانە لە دۆخی ئابوریی جیهان و هۆشداری دەدات لەوەی جیهان دەكەوێتە داكشانی ئابورییەوە.
گەشەی ئابوریی وڵاتانی زلهێز لەوانە ئەمریكا، چین و وڵاتانی ئەوروپا لاوازبووە و مەترسیی گەورە هەیە ئەمساڵ ئابوریی جیهان بكەوێتە قۆناغی داكشاوییەوە، ئەمە ناوەڕۆكی هۆشداریدانەكەی بانكی نێودەوڵەتییە و لە راپۆرتی ساڵانەیدا دەڵێت، پێشبینییەكانی بۆ گەشەی ئابوریی جیهان تا ئاستی نیوە كەمكردووەتەوە.
بەپێی راپۆرتی بانكەكە، بۆ ئەمساڵ پێشبینیدەكرێت گەشەی ئابوریی جیهان تەنها بە رێژەی 1.7% بێت، لە كاتێكدا پێشتر پێشبینیی 3% كرابوو، هۆكارەكەشی دەگەڕێنێتەوە بۆ بەردەوامبوونی هەڵاوسان و بەرزبوونەوەی نرخی سوود و هەڵگیرسانی جەنگ لە خۆرهەڵاتی ئەوروپا.
