قۆناغی سێیەمی هەڵمەتی نیشتمانیی چاندنی یەك ملیۆن نەمام لەسەر بڕیار و راسپاردەی بافڵ جەلال تاڵەبانی سەرۆکی یەکێتیی نیشتمانیی کوردستان، گەیشتە قەزای قەرەداغ و دوای تەواوکردنی رێکارە زانستییەکان، هەڵمەتی نەمام چاندن بەڕێوەچوو .
لەو بارەیەوە حسێن حەمە کەریم نوێنەری نووسینگەی بافڵ جەلال تاڵەبانی سەرۆکی یەکێتیی نیشتمانیی کوردستان رایگەیاند، “هەڵمەتی نەمام چاندن بەردەوامە و ئەمڕۆ جگە لەوەی لە سنووری قەرەداغ بەردەوام بووین و دەستمان بە جێبەجێکردنی پرۆسەی چاندنی نەمامەکان کرد، هاوکات لە سنووری دارستانی ئەزمەڕیش لە سلێمانی چەندین تیم لە کارکردنی بەردەوامدان و بەپێی چەند قۆناغێکی تریش پرۆسەکە بەردەوامی دەبێت و دەچینە شار و شارۆچکەکانی تری هەرێم، ئەمەش لەپێناو زیادکردنی رووبەری دارستانەکان و سەوزایی و پاراستنی ژینگەکەمانە”.
لەبارەی هەڵمەتەكەوە، هاوکار جەلال بەڕێوەبەری دارستان و پاوانی سلێمانی وتی، “ئەمڕۆ ئەم هەڵمەتە نیشتمانییە لە سنووری هۆبەی دارستان و پاوانی قەرەداغ کەوتە بواری جێبەجێکردنەوە، چونکە رووبەرێکی بەرفراوانی زەویی دارستانی هەیە کە پێویستی بە نەمام چاندنە و ئەمەش بۆ هاوڵاتییانی سنوورەکە جێی دەستخۆشییە و پێشوازی لێدەکرێت، بەو پێیەی خەڵکی ئەم ناوچەیە ژینگەدۆستن و دارستانەکان ژینگەیەکی لەباریان فەراهەمکردووە بۆ کەرتی گەشتیاری، بە تایبەت کە ساڵانە و لە وەرزی بەهاردا ژمارەیەکی زۆری هاوڵاتی و گەشتیار لە ناوچە جیاکانەوە سەردانی دەکەن بۆ بەسەربردنی کاتێکی خۆش”.
