بەڕێوەبەری خۆپاراستنی تەندروستیی سلێمانی رایدەگەیەنێت، “بە هیچ شێوەیەك باسم لەوەنەكردووە كە هەموو ژن و مێردێك لە هەرێمی كوردستان دەبێت كۆندۆم بەكاربهێنێت، بەڵكو تەنها ئەو ژن و مێردانەی كە یەكێكیان تووشبووی ئایدزن و بابەتەكە بە لاڕێدا براوە و بە شێوەیەك بڵاوكراوەتەوە كە باسم لە سەرجەم ژن و مێردێک كردبێت”.
د. رزگار عەلی بەڕێوەبەری خۆپاراستنی تەندروستيی سلێمانی لە لێدوانێكدا بە تۆڕی میدیایی ئێستای راگەیاند، ئەمڕۆ ڕۆژی جیهانیی ئایدزە و ئامۆژگاریمان بۆ هاوڵاتییان ئەوەیە كە ساڵی یەكجاریش بێت پشكنین ئەنجامبدەن و كاری نەشیاو ئەنجامنەدەن.
ئاماژەی بۆ ئەوەش كرد، “ئەو كەسانەی تووشی ئایدز بوون باشترە بەردەوام پشكنین ئەنجامبدەن و دەرمان و چارەسەرەكانیان وەربگرن و ئەگەر ژن و مێردێك یەكیان ئایدزی هەبوو پێویستە كۆندۆم بەكاربهێنێت، بەڵام بە داخەوە لە میدیاكان بە شێوەیەك لێكدانەوەی بۆ كراوە كە هەموو ژن و مێردێك كۆندۆم ببەستێت و ئامانجی ئێمە تەنها هۆشیاركردنەوەی هاوڵاتییان بووە بۆ ئەو ژن و مێردانەی كە یەكێكیان تووشی ئایدز بوون یاخود گومانیان هەیە”.
