وتەبێژی پۆلیسی هەولێر رایگەیاند، لە رۆژئاوای شاری هەولێر 22 ژن دەستگیرکراون کە تۆمەتبارن بە کاری لەشفرۆشی و فاڵچێتی.
هۆگر عەزیز وتەبێژی پۆلیسی پارێزگای هەولێر لە کۆنگرەیەکی رۆژنامەوانیدا رایگەیاند، “دوای ئەوەی لە تۆڕە کۆمەڵایەتییەکان باس لە بوونی چەند دیاردەیەکی نەشیاو دەکرا، هێزەکانمان ئاگادارکرانەوە و دەستمان بە لێکۆڵینەوە کرد”.
وتیشی، “توانیمان ئەمڕۆ چەند ژنێک لە چەند شوێن و چەند شەقامێکی گشتی دەستگیربکەین کە کاری فاڵچێتیان دەکرد، لە پاڵ ئەویشدا کاری لەشفرۆشیان دەکرد”.
ئاماژەی بەوەش کرد، “ژمارەی دەستگیرکراوەکان 22 ژن بوون، تەمەنیان لە نێوان 15-55 ساڵاندا بووە، شەشیان خەڵکی سوریان، سیانیان خەڵکی شارەکانی دیکەی هەرێمن، یەکیان ئێرانییە، سیانیان خەڵكی موسڵن و نۆ کەسیشیان نیشتەجێی شاری هەولێرن”.
باسی لەوەش کرد، “ئەوانەی دەستگیرکراون، بە زۆری لەسەر شەقامە گشتییەکانی رێگەی مەخمور و لە بەشی رۆژئاوای هەولێر بوون، لە ئێستادا پەڕاوی لێکۆڵینەوەیان بۆ رێکخراوە تا رێڕەوە یاساییەکەی خۆی وەربگرێت”.
