ئێران هەڵوێستی فەرمیی خۆی لەبارەی هێرشەکانی بۆ سەر هەرێمی کوردستان راگەیاند و وەزارەتی دەرەوەی ئەو وڵاتە دەڵێت، “ئێران هەوڵدەدات ئاسایشی خۆی بپارێزێت”.
دوای هێرشەكانی ئێران بۆ سەر بارەگاكانی حزبەكانی رۆژهەڵاتی كوردستان لە هەولێر، كۆیە و ناوچەی زڕگوێزی سلێمانی، ناسڕ کەنعانی وتەبێژی وەزارەتی دەرەوەی ئێران رایگەیاند، “ئێران هەوڵدەدات ئاسایشی خۆی بپارێزێت و هەڕەشەکان دووربخاتەوە”.
كەنعانی لە كۆنگرەیەكی رۆژنامەوانیدا ئەمڕۆ دووشەممە وتی، “ئێران هەوڵدەدات حکومەتی عێراق دەسەڵاتی خۆی لە سنوورەکانی بسەپێنێت و تاران ناچارنەبێت بۆ بەرگریكردن لە خۆی، پەنا بۆ رێکاری دیکە ببات”.
ئاماژەی بۆ ئەوەش كرد كە چاوەڕوانییان لە حکومەتی عێراق و حکومەتی هەرێمی کوردستان ئەوەیە چالاکییەکانی حیزبەکانی دژبەری ئێران سنوورداربکەن.
وتەبێژی وەزارەتی دەرەوەی ئێران ئاشكرایكرد، هەردوو حکومەتی عێراق و هەرێمی کوردستان بەڵێنیان داوە کە خاکی عێراق نەبێتە شوێنی مەترسی بۆ سەر کۆماری ئیسلامی، بەڵام پابەندی بەڵێنەکانی خۆیان نەبوون، بۆیە کۆماری ئیسلامی هەوڵدەدات ئاسایشی خۆی دەستەبەربکات و هەڕەشەکانی سەری نەهێڵێت.
