لە خۆپیشاندانەكانی پیرەمەگرون فیشەك بەر شوێنێكی هەستیاری ئەفسەرێك كەوتووە و برینداربووە، خۆپیشاندانەكانیش بەردەوامن و تا ئێستا بارەگای دوو حزب سوتێندراون.
بەگوێرەی زانیارییەكانی تۆڕی میدیایی ئێستا، خۆپیشاندانەكانی شارۆچكەی پیرەمەگرون بەردەوامن و پاش ئەوەی بارەگای كۆمیتەی یەكێتی و مەكۆی گۆڕان لەلایەن خۆپیشاندەرانەوە سوتێندران، ئێستا خۆپیشاندەران چونە سەر بارەگای ناوچەی پارتی و ئاگریان لەو بارەگایەش بەردا.
هەروەها هاوكاتی بڵاوكردنەوەی ئەم هەواڵە، گرژییەكان لە پیرەمەگرون بەردەوامن و دەنگی تەقەیەكی زۆر دەبیسترێت.
لەلایەكی دیكەوە، سامان نادر، بەڕێوبەری سەنتەری فریاكەوتنی سلێمانی تایبەت بە تۆڕی میدیایی ئێستای وت، “ئەفسەرێكی پۆلیس كە نازانین سەر بە چ هێزێكە، لە خۆپیشاندانەكانی پیرەمەگرون فیشەك بەر ‘سمت’ی كەوتووە و بریندار بووە، ئێستا لە نەخۆشخانەی فریاكەوتنی شارە لە سلێمانی بۆ ئەوەی چارەسەری پێویستی بۆ بكرێت”.
بەڕێوبەری سەنتەری فریاكەوتنی سلێمانی ئەوەشی خستەڕوو، “ئەو ئەفسەرە ناوی (ھ.خ)ە و تەمەنی 33 ساڵە، بە لەلایەن خۆپیشاندەرانەوە تەقەی لێكراوە و بریندار بووە”.
